AMA Tobo su pake celana renang deng reben. Tua rencana mo pi mandi di Pante Kelapa Lima. Dia rencana dar ruma pake itu pakian memang. Ko mo pusing apa ju eee. Biar orang di jalan lia heran deng tahedek ju tua son farduli.
"Lu son malu sadiki ko. Maksot apa hanya pake itu celana color sa. Mo pasmen ko. Ato mo bekin kaco itu ana muda di jalan sana," Ina Feok omong dia pung laki. Ma Ama Tobo son huhe ju. Tua mala maken bagaya, maken PeDe.
"Ma..mi. Bisa antar sang beta ko," Ama Tobo basengaja ajak dia pung bini. Dia pung cara tu supaya Ina Feok jang talalu bacuriga deng dia. Ma Ina Feok maken manyala. "Ko lu mo pi bagatal na neu," maitua masparak Tobo dengan suara ton tinggi.
Ma Tobo pung cara omong tu laen lai. Dia bilang kalo mau na pulang mandi langsong singga pi toko apa ko untuk beli gelas deng piring. Ini karena su berapa hari dong makan taro di landas sa. Ko piring samua su pica na.
Pas jalan, Tobo tanya Ina Feok. Mo pi mandi di Pante Kelapa Lima, Pante LLBK, Pante Lasiana ato Kali Dendeng. Kalo samua pante Ina Feok bilang dia su parna pi. " Ketong pi Kali Dendeng sa. Bisa ko bu," ini kali dia panggel Ama Tobo sebage bu.
"Beta ju satuju. Ko itu tampa be belom perna pi na. Ketong pi lia. Bilang pamarenta dong mo bekin sebagai kolam renang untuk warga kota," Tobo anggok kapala ulang-ulang. Partama karena dia son perna pi. Kadua banya orang bacerita bilang itu tampa baek. Tiap hari libur deng hari Minggu samua orang kas ponu.
Dong dua laki bini ju pergi. Kamudian di deng puas di itu tampa. Maitua ju bilang kalo pamarenta dong mo pake sebagai obyek wisata musti benahi deng baek. Bekin itu tampa ganti, kamar WC deng hal laen. Musti ju kas tunjuk itu tampa untuk ana kici deng orang besar dong mo mandi. Trus Ina Feok bilang lai, pamarenta kas orang yang kalola tu deng baek. Jang sampe hanya kas bunyi peluit sa. Sama deng patugas parkir dong.
Kalo yang namanya fasilitas umum tu, pelayanan musti kasi deng baek. Kalo orang datang na layani deng baek. Patugas dong jang basuka mara karena nanti orang dong bisa lari.
Pas pulang dong dua laki bini maen jalan lenggang kangkong sambel bapelok. Ma ini kali Tobo son pake pakean renang lai. Ko ada maitua. Kalo mo iko mau nanti tau sa to. Maitua bisa masparak, bisa ju nae tangan. Lia maitua bagitu Tobo rencana mo pi lapor polisi. Sakarang tu dunia aga tabale. Bini dong yang maen papoko laki. Kacian-kacian de lu. (thomas duran)
Tidak ada komentar:
Posting Komentar