Inga-inga Tiga eM...

AMA Tobo ke badongko mo mati ito pagi. Son tau kanapa ko baptua su pegang deng reket nyamuk ko kabas pi datang. Son puas deng reket ju baptua mulai pi tapuk sana-sini. Dia pung bini yang lai bamasak su mulai nae dara. Maitua bukan dongko karna nyamuk tapi karna lia dia pung laki jalan pi datang, muka balakang bekin kapala saki. Son lama te maitua su maruak."Lu ni, kas tenga dia idop kanapa e...Pi datang, muka balakang, son lama ito binatang su maso di ini kuali samua." Ina Feo nada tinggi masparak dia pung laki. Ma Ama Tobo ju son mo diam. Te baptua ju su maruak."Lu ni beta yang papoko ini nyamuk lu yang sesak napas di situ. Su bae ko beta ada niat mo kabas kas mati. Ato lebe bae maso di kuali masak ko katong makan. Darpada dia yang makan sang katong? Ina Feo dangar dia pung laki bilang bagitu ju tahedek."Apa, lu gila ko. Ada lai mo makan nyamuk. Yang ada na lu ais makan munta mancret." Dong dua laki bini son mo kala. Metu yang ada dangar dar sabala ruma ju son lama su pi liat dong dua."Ko basong dua kanapa lai? Su tua kakuluk son mo basayang, te maen bakalai tarus sa. Kanapa?" Ina Mata langsung sambar."Oh, be napas sesak deng ini tua satu ni. Dar tadi runggu rangga muka balakang pi datang mo kas mati ini nyamuk. Son bisa lia orang sanang sadiki mungkin." "Oh, jadi basong baku mara karna ito nyamuk. Tapi bagini susi, beta satuju lebe bae basong kabas bae-bae. Apalai mo tidor. Bila parlu pake kalambu. Tarus, kalo ada bak aer dong ato kaleng-kaleng bakas dong, be harap basong bisa kas barisi ato kuras san dia. Bila parlu kas kubur dia bae-bae. Basong dua tau, sakarang tu panyaki malaria deng demam bardara lai rame. Ito di ruma saki sana tu ada ponu, jang tamba lai." Ina Foe dangar mati pung. Ma Ama Tobo ju su kas komentar."Ito lu dangar su. Te lu bilang kas tenga, ko lu mu maso ruma saki ko. Doi dar mana? Te katong kira-kira kapan ko ada asuransi biru ko katong bisa maso garatis. Beta ni son mo tunggu pamarenta kas foging ko apa ko, lebe bae be inisiatif sandiri. Be taku kana ito panyaki ane-ane lai.""Itu su, musim ujan angin bagini lebe bae katong kas barisi ini bak-bak mandi, kumbang, tampa sampa dong, saluran aer. Lu tau to, ito nyamok dong kalo su makan sa katong, langsung kana. Itu dia pung istila tu tiga eM, yang be tau tu Menguras, Menutup dan Mengubur. Jadi inga ito bae-bae mama. Lu jang hanya inga lu pung diri, inga deng ana ju. Makanya kalo be ada karja puku nyamuk tu jang mangomel." Ama Tobo kas ingat dia pung bini."Batul e, bararti sakarang katong harus bagi tugas su, untuk karja kas barsi satiap hari. Be su, be pikir lu kurang karja ko mo kas mati ito nyamuk, te ternyata ada dia pung pangaru ju. Be ni kalo lia be pung laki su rajin be pung sanang lai," Ina Feo su mulai kas sanang dia pung laki. Metu yang lia dia pung kawan su baku sayang deng bini, su langsung pamit pulang. "Aue.....beta su jalan o....." (apolonia matilde dhiu)

Son sarius bantu....

MAMTUA Ne'i ada badiri di dapur sambil fuga sayur kangkung, karna dia pung laki paling suka makan kangkung. Tiba-tiba ujan turun deng angin kincang. Dong pung atap seng babunyi kruk-krak karna paku su talapas. Bolom lai bocor, dapur jadi babecek minta ampon. Mamtua Ne'i batarea dia ana parampuan. "Mia, lu ame ember ko tada ini aer ujan dolo, te dapur su babecek ni. Beta tar bisa kastenga ini sayur karna nanti angus." Mia yang ada dudu tanganga sambil angka kaki di karosi, langsung mangomel deng dia pung mama. Biar mangomel ma, dia jalan pi balakang ju cari ember."Paling jengkel ko, tiap kali ujan, musti cari ember ko tada aer. Son mau ganti seng sa, ma bekin repot sa," Abis taro ember di tampa bocor, dia kambali pi dudu di muka. "Kasian e, kalo musim ujan bagini ni. Su banjir lae, ada yang ruma sampe rusak. Karmana o, untung ko kotong sonde bagitu," To'o Pe'u yang ada maloi, cari seng yang bocor deng liat kayu yang su fufuk karna kana aer, kaget dengar dia pung ana parampuan pung omong. "Beta heran, ko lu bisa ada pikiran bagitu, karna beta tau lu son parna toe deng orang. Orang mo susa ko sanang, ju son parna toe. Lu tau ko sonde, di Sikumana tu, ada orang yang dari bulan sabalas sampe sakarang masih tidor di bawa tenda karna dong pung atap ruma ta angkat karna angin kancang," Ama Tadu yang ada badiri di muka pintu langsung tamba deng To'o Pe'u pung baomong. "Batul bu, itu hari kotong pung walikota ju sampat pi lia deng dong. Baptua janji mau kasi bantuan, ma tau sa, sampe sakarang ni pemkot ju sonde bantu-bantu. Tartau karmana dong pung idop sakarang ni, karna ujan pung besar lai. Beta kasian e, untung ko sonde kana di kotong. Ma kalo kana di beta, beta pasti pi tagi janji o. Jang hanya janji-janji sa. Orang Kupang bilang bikin mulut manis sa. Beta baca di koran, bukan hanya walikota sa ma camat ju datang, dia ju janji mau bantu,' Ama tadu tarek karosi ko dudu sambil lia To'o Pe'u.To'o Pe'u su cape lia seng yang lobang, jadi baptua ju iko dudu sam-sama deng ama Tadu. "Batul su ama, beta ju bagitu. Lebe bae ta usa janji darpada janji baru tar kasi. Itu namanya putarbalek. Karmana rasanya kalo orang putarbalek deng kotong, pasti makan hati. Tartau itu bantuan lari pi mana o. Jang sampe ko lari pi ruma pajabat o, baru bilang su kasi bantuan. Karna kalo su janji, pasti ada, tapi sampe sakarang son datang-datang ju itu janji. (hermin pello)

Jang maen-maen o....

AMA Tobo dudu sandiri di bawa tenda. Baptua ke su son ada harapan idop lai. Andia ko tangan topang dagu sambel geleng-geleng kapala. Dia pung mulut ju sama ke ada jait. Soalnya su mo amper tiga bulan ni Tobo balom bisa bekin ruma na. Mo ambel uang dar mana lai bekin ruma. Baptua pung karja ju hanya pi dorong garobak pi pasar. Ruma yang dia bekin tempo hari sabalom angin bawa tu, karna baptua rajin tabong satiap hari. Ma sakarang mo karmana lai, mana ana dong ada sakola lai. Dia pung konco Metu yang pange san dia ju, baptua son paduli. Pokonya dia diam sa."Oe.......lu mo sampe kapan bagitu tarus. Lu tamba diam......mana katong pung ama-ama dong di kantor sana mo dangar. Lebe bae sakarang, katong dudu ko baomong, katong pi ko tagi sa. Ma kalo katong tunggu tarus, son lama katong dudu lu'u sa di sini tarus. Son ada parubahan. Apalai katong ni su tua-tua." Metu son paduli dia pung kawan mo jawab ato sonde, yang panting dia su kas pandapat. Ama Tobo yang dar tadi diam, sakarang su baomong. "Itu su kawan, be ni malu deng be pung bini ana dong. Be kasian deng dong, karmana mo mandi, mo ganti pakean kalo mas tenga di tenda taros. Padhal be su berharap, katong pung ama-ama di kantor sana bisa datang ko sagara mo kas katong bantuan sadiki ko untuk bekin ruma sat aer ko su lumayan. Yang penting katong pung ana bini dong jang sangsara." Ama Tobo baomong aer mata amper mo jato. Baptua inga parna kas janji dia pung ana mo beli buku tulis. Ma sakarang son bisa lai. Uang yang dia dapa mas mo beli kayu bekin ulang ruma.Son lama Tobo su tare napas panjang. "Kanapa orang kici ke katong ni yang salalu dapa musiba. Be rasa Tete Manis ni son adil. Ada orang yang idop dar kacil sampe mati son parna susa. Ada yang susa tarus ke katong ni." Metu yang dangar bagitu ju su raba-raba dia pung dada. Metu ju kasian lia dia pung kawan. Ma mo bekin apa o.....Dia ju orang kici. Son lama te dong dua su tahedek dangar ito suara dar jalan. Ina Mata deng dia pung kawan-kawan parampuan dong su batarea. "Itu manusia dong di sana tu jang maen-maen e....Katong masrakat ni bukan sama ke anak kici yang bisa dong maen-maen, janji-janji...Su datang ko mo kas bantuan, omong ais ilang sampe sakarang. Karmana ni...." Ina Mata batarea sama ke su foe apa ko. Son lama ito ibu-ibu ju su mangomel. "Itu makanya jang parcaya deng orang yang suka kas janji. Basong na mo parcaya sa....Laen kali kalo datang lai son usa toe. Lebe bae ada karja katong karja, dar pada kas layani san dong, ma son ada realisasi." Itu maitua su foe pake bahasa tinggi dong. Ais sakarang parampuan dong su pintar-pintar na, apalai mo pamilu ni, parampuan dapa kuota tiga polo parsen na. Metu yang dangar su son ena lai, pi deka-deka ko baomong."Aue.....Beta ni sanang kalo mama-mama su mulai pintar tarus mo bangkit. Ma caranya jangan bagini. Kalo mao baomong pi bae-bae ke kantor sana, katumu katong pung ama-ama dong tarus minta dong pung waktu ko baomong. Karna kalo mo batarea sa di jalan bagini, sapa mo dangar o....Katong musti tunjukkan bahwa katong ju bisa mara. Tapi biar bagemana pun katong ju musti mangarti, jang-jang katong pung ama-ama dong mas sibuk deng banya urusan di sana." Metu kas dingin situasi. Ma dasar ibu-ibu bukanya mo diam mala tamba foe."Oh lu bae, lu pung ruma son kana bawa dar angin. Ma katong. Makanya kalo mo bajanji tu jang maen-maen. Janji tu utang. Lu harus mangarti." Ina Mata den dia pung kawan dong tamba foe. (apolonia matilde dhiu)

Pi jalan yang benar....

"LIA lenso mera muda/ inga-inga ko pu muka," Tobo nyanyi itu lagu sepo'ong Ian Ulukyanan pung lagu. Ini lagu dari Papua ma kata-kata ju son talalu beda deng di sini. Tau to. Sapa itu Ian? Jang maen-maen ooo. Dia tu kalompok Black Sweet yang tempo dolo sampe sakarang ju samua orang ju tau. Kici, besar, opa deng oma ju tau samua na.Belom lai kalo mo sebut Black Brothers. Tartau sakarang dong di mana eee. "Be dengar bilang ada di Selandia Baru," Bai Ndu ju manyaot pas Tobo sebut itu grup musik terkenal itu. Dong pung lagu tarkenal itu Hilang deng Hari Kiamat. Kamudian ju dia sebot lai Panbers, Favorit Grup, The Mercys, De Loyd, Koes Plus deng masi banya lai.Pokonya ini kali Tobo deng Bai Ndu hanya mo omong musik sa. Omong artis tempo dolo. Omong politik su bosan. Kapala pusing tuju kaliling. Apalai mo omong orang bakalai sampe babunu. Tua bangka dua-dua ju mulai riwayat studio rekaman lama dong. Ada Purnama Record, Nirwana Record, Gaja Mada Record, Aquarius deng laennya. Kalo su sebut samua, dong dua hanya tarek napas sa. Ko itu hari dong tu beli itu samua kaset na. Sakarang tu karena su tua bangka jadi son talalu lai. Ma kalo foe su datang ju dong dua jalan bakaliling ini kota ko bacari kaset lama dong.Kalo son ada na dong beli kaset lama Jeem Reevs, Skeeter Davis, Frangki-Jane, De Rosen Grup deng Mutis Grup. Dong ju cari Max da Gama pung kaset Musim Gugur ma son dapa lai. Sampe-sampe dong pesan pi no satu di Nagi sana cari itu kaset di Toko Oriental. Ma di toko Oriental ju su son jual lai."Kalo baba di Nagi sana produksi ulang be beli samua. Biar satu kaset harga 100 ribu rupia ju beli na. Itu lagu-lagu itu gaga. Sakarang, lagu-lagu yang ana muda dong pung tu ke karmana ko. Cepa ilang. Ma yang dolo pung son mungkin ilang eee karena kuat di dia pung syair, kata-kata," Bai Ndu maen boto-boto trus. Tobo ju kamudian nyanyi lagu Ina Maria yang Yolanda nyanyi deng pastor redemtoris dong. Ada brapa lagu lai yang Tobo kas kenal pi Bai Ndu. Apalai album itu ju ada Ama Viktor Hutabarat iko banyanyi. "Talalu, talaluuu... Bu beli dolo ko itu kaset. Ada bajual di gareja sana. Itu pastor yang dong pung ordo di Sumba sana ada bekin itu lagu trus nyanyi sama-sama deng Ama Viktor deng Susi Yolanda. Dia pung musik ju pake irama contri. Ada pake ju biola deng sexofon," Tobo kas kenal itu album yang dong kas judul Ave Maria.Kamudian Bai Ndu ju bilang. Sakarang orang ju lebe senang buka lagu rohani. Lia sa Trio Sonbilo pung lagu rohani, To'o Seme pung lagu Inang deng Amang, To'o Messakh pung Lebe Dekat deng Dia deng masi banya lai.Bai Ndu ju bilang, sakarang tu samua orang lebe senang nyanyi lagu rohani. Ke mo lebe deka deng tete manis. Sakarang tu Tobo ju bilang dia pung, musti ada kampanye kambali pi jalan yang benar. Kalo sonde ju ketong pung bumi ni su kiamat. Dosa maken banyak ahernya tete manis ju mara ko cabut ketong pung idop. (paul burin)

Inga basudara di kampong...

DUDU pake baju kaos oblong, Ama Tobo ambel gitar ko mulai kuti satu-satu. Dia ju mulai nyanyi lagu Desaku Yang Tercinta. Itu lagu tu Ibu Sud yang bekin. Pokonya dia pung inti lagu tu bagus. Lagu itu dia kas gambar tantang suasana di desa yang inda. Desa yang damai, aman deng sentosa. Desa di mana orangtua kas lair ketong. Terakir Ibu Sud bilang salalu rindu inga kampong halaman. Sabanarnya lagu itu sebage cerminan hati Ibu Sud. Biar dia tenggal jao di Jakarta ma masi inga deng kampong halaman. Inga samua basudara. Bagitu kira-kira.Na, itu lagu tu Ibu Sud bekin taon brapa. Mangkali ju waktu itu Ama Tobo masi kici ana. Sakarang ni suasana ke itu masi ada ko sonde. Tobo sengaja sa mo angka itu lagu trus dia ju mo kas cocok deng sakarang."Ini lagu bagus. Ma suasana itu ke son ada lai," Ama Tobo taro itu gitar ko baomong sandiri. Dolo, Ama Tobo bilang, lagu itu memang pas. Sakarang ni son ada lai. Mo aman karmana. Orang su bamara, su bafiruk deng su bamaen politik jahat. Kas ga'e orang ko jato. Kas kaco satu-satu sampe samua jadi kaco abis.Hal laen tu banjir su datang trus kas genang itu kampong dong.Jakarta sebage kampong besar sa sakarang ke son bisa bekin banya. Pamarenta samua bingong bodo. Sama deng urus kasus Porong di Jatim sana. Itu kota ke su jadi aer samua. Sampe-sampe bandara internasional Soekarno Hatta sa su son barfungsi lai. Pamarenta dong kerakan mesin sedot aer ju son bisa. Itu omong Jakarta. Di ketong pung kampong, su barapa hari ini ju ujan besar. Kalo su bagini pasti sa ada ujan kas genang orang pung ruma. Kalo sa ini kota rata, samua ruma su tarendam abis. Tarakir nanti sama deng Jakarta deng kota laen di Jawa sana. "Beta ke sediii. Ini sebage tanda apa ooo," Ama Tobo su pikir jao pung.Lama-lama ju kawan kuti kalereng waktu kici datang. Biasa, Bai Ndu su datang deng bawa itu aer kata-kata. Bai Ndu tau diri. Kalo omong son tap sadiki, mulut takancing. Ma kalo satu dua saloki, sapa mo larang. Mulut nanti paleng idop ke panta ayam.Dong dua ju mulai baomong haaa. Tobo mulai angka itu banjir ada di mana-mana. Trus nanti muncul itu bencana alam, penyaki deng masalah sosial laen. Dong dua ju bilang mo panggel adi wartawan dong kas panjalasan. Sebage orang yang paduli deng alam, dong mo kas inga pamarenta dong supaya salalu siap. Siap bantuan makanan, pakean deng kabutuhan laen. Pas maloi di botol te, sopi su abis. Tau to omong satu kata, satu sloki na. Tarakir dong dua su pake bahasa Inggris, ma tau sa to. Hanya bisa yes deng no. Dasar pamabok na. (tomas duran)

Iko rayakan imlek......

BAI Ndu son pusing deng hujan angin yang ada tampias di luar. Tua satu su pasang dia pung muka idong di muka cermin. Baptua taputar lia pi balakang, pi dapan dar kapala sampe kaki. Son lama baptua su ganti jas deng dasi. Sapatu smer mangkilat mo mati. Son tau mo pi mana ko. Andia tua satu ni su bastel sa. "Ini hari pokonya be son paduli mo hujan ko, mo angin ko pokonya be harus pi na. Be pung kawan ongko deng aci dong pung hari bae. Soalnya, kalo be son pi dong bilang apa sam beta o...." Bai Ndu baomong sandiri.Ina Mata yang ada pasang talinga dar dapur su komat-kamit. Maitua stres deng dia pung laki, gara-gara mo buka gentong aer minum son ada. Te ini pagi, baptua bilang son mo diganggu. Andia ko Ina Mata mo baomong sabantar sala lai. Bilang son mangarti karir laki, son mandukung. Biasa Ba'i Ndu kalo su mara, lebe bae diam sa o. Soalnya kalo sonde, bisa-bisa ini hari gigi deng rahang dong bisa rubu na."Bae su be pung laki ni. Dapa bini ke beta. Ma kalo sonde, orang son pusing, son paduli. Ko hanya mo pi kas salama sa, bangon pag-pag buta son inga pakarjaan di ruma. Katong ni mo urus ana, mo urus makan minom ko, mo pi angka aer." Maitua mangomel ma plan-plan sa di balakang. Maitu ju ada taku, kalo su tagang bagitu, biasanya dia pung laki son mo tau na. Son lama te, maitua su dangar Ba'i Ndu ada batarea dar dalam."Mata....Mata......ko lu ada karja apa sa di situ. Dar tadi lu'u sa di dapor situ. Laki mo jalan son datang lia, su rapi ko balom ko." Ina Mata dongko mo mati. Maitua lia dia pung laki su talalu sibuk karmana ko. Su son bisa tahan lai deng dia pung laki pung kalakuan, te maitua su maruak."Ko lu ni ada foe apa ko. Pag-pagi su batarea. Lu kalo mo jalan pi mana-pi mana lia-lia dolo. Lu son lia ko di luar sana ada hujan angin. Lu mo paksa diri mo bajalan. Son bisa tunggu lai sabantar sadiki dia su karing ko." Ina Mata ju son mo taku lai dia pung laki. Soalnya baptua talalu parlente karmana ko."Mama e....beta ini hari ni son mo mara-mara lai." Ba'i Ndu su baomong plan sama deng maitua. "In dia ni, ini be mulai curiga. Kalo laki dong su baomong bagini bae-bae deng bini dong. Son saparti biasanya. Ko lu ada apa. Lu jang bekin be emosi o...." Ina Mata ju tahedek, ko dia pung laki son maruak kalo dia mulai baomong banya.'Lu mo pi mana? Be lia lu bastel bagitu, baru lu su baomong ke mo barayu sa." "Mama.....sayang......e....Lu tau ini hari ni ada hari bae be pung kawan dong. Lu tau to ito Ongko Matias yang di ruko tu, ada hari bae Imlek. Makanya be mo pi pegang tangan deng dong dolo. Basong ni dasar parampuan. Di basong pung otak ni yang negatif sa. Basong sat-satu kali pikir yang bae kanapa?" Ba'i Ndu kas kotba dia pung bini. Ina Mata su sanyum sandiri. Maitua ju su malu-malu deng dia pung laki."Lu lia di luar tu ujan lebat a.....Ito bararti hari bae untuk katong pung kawan-kawan yang rayakan Imlek dong. Bararti ini taon bae, taon yang panu deng berkat, taon subur, son ada lai kalaparan." Ina Mata yang dangar dia pung laki baomong langsung sambong."Lu ke tau-tau sa. Lu tau dar mana ko bilang bagitu. Memang ini pas bulan yang musim ujan. Lu mulai ane-ane su. Coba jang gila dong." Ina Mata mulai iko ito Abe-Ge dong yang baomong di televisi.Pas dong lia bini ada bate'e, Metu yang ada lewat singga ame sabantar. Metu ju heran lia dia pung kawan su bastel mo mati. Bau minya rambu ju manoso mo mati. "Ko lu mo pi mana. Be lia lu su talalu lebe-lebe. Lu mo pi iko tender paroyek ko?" Metu tanya ke son tau dia pung konco sa yang tukang bagaya."Na ini dia, kalo talalu lu'u di dalam ruma. Makanya, kalo jadi orang tu yang gaul sadiki. Kaluar ruma, baku tanya deng tatangga. Jang sampe pas ada apa-apa lu mati orang son tau." Metu yang dangar dia pung kawan mulai omong sambarang langsung manyao."Lu ni, suanggi ko apa ni. Omong mati sagala. Lu barani be ada apa-apa, be langsung tau lu na." Ina Mata yang lia dia pung laki deng Metu su baku mara mulai kas jalan tanga."Aue, basong dua ni su karmana ni. Baomong bae-bae son bisa ko. Basong mau satiap hari mus ada baku te'e satu deng satu." Ba'i Ndu su anggo-anggo kapala."Metu e....lu ni sensitif ke ito putri malu sa. Bagini, be ni mo pi iko salama hari Imlek. Ma kalo lu mo iko, mar katong pi sama-sama." Metu langsung sananga. "Oe, lu tunggu beta e. Be ju iko." Son lama te Metu deng Ba'i Ndu su piko deng payung ko jalan. Dong dua su son paduli lai deng ujan angin. Dong tau sa ada hari bae. Salama hari Imlek. (apolonia matilde dhiu)

Lomba babalas pantun...

"MAKAN pisang, makan kedondong, kalo bedagang jang lupa untung. Bua semangka bua durian, kalo su tua bangka jang sandirian. Bua kenari, bua nangka, hadapi hari jang prasangka."Dar dalam ruma, Bai Ndu su baomong pantun. Sampe brapa kali tua masi omong itu barang. Son lama ju suara dia kas nae lai, kas turun deng kas lurus sa. Sambel omong, baptua baloti di carmin basar di ruang tenga.Dia ju kas suara besar deng kici. Itu dia pung maksot untuk dengar sandiri. Tua ju ada rekam pake teip kici di tangan sambel bajalan maju deng mundur. Kamudian dia putar ulang trus lari pi jalan ko badengar suara sandiri.Tua ju mulai panggel kawan dong ko kas nilai. Samua omong jempol Bai Ndu. Dong bilang kalo Bai Ndu maju pasti menang na. Dong samua pili karena tua omong su bagus. Kanapa sampe su siang bolong tua bapantun, trus panggel kawan dong ko badengar sama-sama? Dangar-dangar tua latihan mo iko pamilian katua eRTe. Sakarang tu dia pung aturan, calon musti kampanye program na. Tau aturan bagitu, Bai Ndu langsong siap dia pung materi kampanye na. Pas dia ju aga jago bekin pantun, andia tua siap kampanye program pake pantun.Tua mo bekin samua tangaga bodo dolo. Yang penting tunju jago dolo. Yang penting mejeng deng kas mulu jadi enak trus yang dengar ju pasti senang tooo. Son lama, Tobo su datang. Pas datang dia ju togor Bai Ndu deng pantun. Tali rafia, tali sapatu, biar mafia tetap satu. Burung elang, terbang melayang, kalo sombong siap tabanting. Ile Boleng, Ile Mandiri, jangan oleng di tanah sandiri.Samua di itu tampa ke kaget na. Ko ini kali tua bangka dua-dua katumu pake pantun. Satu orang ana muda ju son bisa basambong. Biasa kalo bagitu, Kawasa ato Satel su sambong harbabiru. Tau to itu ana kota dong. Son tau memang itu pantun. Son lama Kawasa ju angka suara, "Naek honda, naek pesawat, katumu ana muda, jang lupa nasehat. Naek angkota, tujuan naibonat, biar ana kota son lupa adat."Hanya dua pantun sa yang Kawasa bisa bekin. Kamudian dia bilang, dia masi balajar bekin pantun yang baek. Samua di situ su tepuk tangan rame. Dong ju bilang Kawasa ju bisa iko kampanye jadi katua eRTe. "Kalapa muda, jagung goreng, kalo masi muda, masi oleng. Makan stik, isap tulang, maen politik jang tembak langsung," Satel son mo kala tapa pake pantun. Dia pung pantun ju langsong puku Kawasa pung muka. Ma Kawasa ju son mo huhe. Dia tarima deng sanyum sa. Sebelom masa kampanye, dong samua katumu lai ko lati ulang. Ma Ama Tobo son mo iko lai. Di papan pak laru Tobo tulis jalas. Dia bilang, samua jang mara te be mo pi kasi carama di kampong sabla. Yang penting sakarang ada lomba babalas pantun. Ada hal yang baru na! (paul burin)

Tampa wisata ko tampa angker...

MAMTUA Ne'i ada dudu talepo sambil iris bonak ko mau bekin rampe karna dia mo pi siram kubur di dia pung kelu pung kuburan. Tarlama dia pung laki, To'o Pe'u datang badiri di dia pung rebis sambil cakar pinggang. "Beta heran deng lu e. Ada apa ni ko tiba-tiba mo pi siram kubur. Ma kalo mo pi na capat su, kotong mo pi mana sa, pi di Fatufeto ko, Mapoli ko di Fatukoa sana, sabantar lai su mathari su mau tanggalam ko galap. Beta sonde mau pi tampa bagitu o kalo su galap na," baptua Pe'u su basatel abis, jadi dia pamalas tunggu lama-lama.Tarlama ju dong pung tatangga, Ama Tadu ju muncul di dong pung ruma karna kalo satu hari sa dia son muncul, pasti ada apa-apa. "Awi, mo pi siram kubur ko, sapa pung hari mati ni," Ama Tadu langsung dudu jongko ko ame bunga, kasi barisi bunga.Sambil kasi barisi, Ama Tadu pung mulu tarberenti omong. "Bosong su tau ko bolom, kotong pung walikota tu ada bekin rancana, bilang mo bikin TePeU di Fatukoa yang dong biasa bilang TPU Dame tu diganti, sonde jadi TPU lai tapi su jadi tampa wisata. Ko dia bilang karna nanti aer bisa kana cemar, jadi sonde bole lai kubur orang di situ. Ma tapi, ada yang ane karna beta baca di koran tu, dewan kota su tolak itu rancana karna dong bilang hasil penelitian dari dinas kesehatan di warga pung sumur, sonde ada apa-apa. Ini yang beta jadi bingung, kotong musti parcaya yang mana o, parcaya deng walikota ko deng dewan kota," baptua Pe'u yang memang ada sadiki pana'u langsung kaget dengar Ama Tadu pung carita. "Awi, yang batul sa, Ama Tadu, masa mo bikin jadi tampa wisata, yang be sa, sapa o yang pi tampa angkar bagitu o. Kalo mo bekin rancana tu, jang yang ane-ane. Ta usa omong yang laen. Ko itu tampa pasiar di pasir panjang sa sonde tarurus deng bae, su jadi tampa tarbatul. Tampa orang pacaran, tartau lai. Satu tampa bolom tata deng bae, su mau bekin tampa yang laen, lebe bae bekin babae yang satu dolo baru buat rancana lai. Beta pikir, sapa o yang mo pi tamba bakas kuburan, jang-jang kotong baru sampe, tiba-tiba dapa lia orang malayang di udara, hi....," baptua pung kapala langsung bagoyang karna pana'u. (hermin pello)

Jang omong jao bagitu...

"BETA ni mo kestau satu barang. Kalo jadi orang tu jang talalu puku dada. Maken renda hati, orang makin sayang ketong," son ada ujan angin Ama Tobo mulai nasehat. "Kalo orang kas parcaya lalu bekin-bekin ato son anggap orang laen itu tanda dunia su mo kiamat," Ama Tobo omong tamba foe sa.Ini pagi tua satu boto-boto deng maksot apa ju orang laen son bisa tangkap. Bai Ndu yang ada pasang talinga dari sebla jalan ju son bisa tangkap Tobo pung maksot. Andia, baptua ju su datang deka-deka ko mo dengar langsong."Bu, kalo ada sesuatu omong jalas. Jang omong jao bagitu. Sakarang tu ketong su tua sama-sama. Jadi kalo mo omong na jang sambunyi-sambunyi. Sapa yang biasa puku dada," Bai Ndu omong ke mara bagitu. Ma lia pi Tobo, tua su dudu masa bodo. Tua ju baca itu barita apa ko. Ini ni yang bekin Bai Ndu mulai palan-palan baca Tobo pung jalan pikiran. "O... bu, mangkali itu orang bakalai sampe ada yang mati ko," Bai Ndu lempar lai pi Tobo. Biasa kalo ada kawan dong bisa baca dia pung mau, Tobo langsong manyaot."Ini ni yang bekin be pung hati senang. Kalo bu tau bagitu sakarang be kasi hadia. Mau apa. Sopi, es teler, makan di ruma makan goyang lida ato apa. Tersera bu," Tobo kas jempol Bai Ndu."Samua. Kasi sopi, es teler, es mangkok deng makan di ruma makan goyang lida," Bai Ndu jawab sante sa ma ada omong batamba es mangkok. Ko dia tau na. Tobo tu tipe orang yang mau kana puji. Apalai kalo maen angka trus. Bisa-bisa lupa diri. Biar doi mo kas sambunyi di mana lobang, tua angka hanya ko pi jamu orang.Ma seblom dong bajalan, Ama Tobo omong lai. Dia bilang, son bisa batahan lai lia ada orang yang dia pung ruma su tabakar. Kamudian dong mangungsi jao. Yang bekin Tobo tamba sedi tu ada orang yang su mati. Tartau kana tembak, kana firuk ato apa. "Bu, kalo omong itu barang be son bisa. Bisa-bisa orang bilang ketong tudu orang. Lebe bae ketong pi tanya polisi sa," Bai Ndu su kas jalan.Ma Tobo bilang kalo sakarang tu suasana masi panas. Polisi ju mangkali belom tau sapa dong yang babonu. "Beta ni rasa sedi. Karmana kalo ketong pung kelu yang mati di jalan. Sapa yang tanggong jawab dia pung bini deng ana dong. Mo kas makan karmana," omong abis Bai Ndu pung aer mata tadudu. Son lama tua batutup mata. Dia pung mulu ju maen komat-kamit. Dia bardoa, minta tete manis tarima itu orang yang mati. Trus tua ju doa minta kakuatan buat dia pung maitua deng ana dong. Dalam dia pung doa, Bai Ndu ju minta tete manis kas dame samua orang di sana. Kamudian, Tobo ju doa dia pung. Dia bilang, ketong pung idop tu son bisa lari dari kamatian. Sapa sa bisa mati, kapan sa. Tenggal tunggu dia pung waktu yang pas. Samua orang ju son tau kapan dia pi mangada bos di Atas. Ma kalo bole, Tobo minta baptua di Atas, panggel ketong jang talalu capa. Kalo memang ketong idop sandiri sa, son soal. Ma kalo ada tanggung jawab bini deng ana dong, bapa partimbangkan bae-bae.Kamudian dong dua angka muka. Pas lia te aer mata su tadudu samua. Dong dua tarnyata ada manangis pas bardoa pi tete manis tadi. Kamudian tua bangon ko pasang lilin sambel barlutut. Dong samua barduka. Belom karing dong pung aer mata, Kawasa su datang. Sambel jalan doka-doka, Kawasa bilang ada demo di mana ko. Ma tua dua-dua tadiam. Kawasa yang son tau hal langsong pica katawa. Dia bilang ada mabok ko? Ko biasa, Tobo deng Bai Ndu tu kalo mabok tu biasa manangis rame-rame na. (reddy ngera)

Musti baomong banya...

SU brapa kali Bai Ndu baca koran itang. Dia baca ulang-ulang itu Moat Oscar Pareira Mandalangi pung tulisan. Sambel kas jempol, Bai Ndu puji moat Oscar. Dia bilang itu moat pung jago tu pung pi lai. Otak barisi, encer deng bisa ga'e tulisan mulai dari Malayu, Betawi, Kupang, Nagi sampe Sikka."Ini moat jago eee... Pasti baca banya deng suka baomong. Be belom kanal ma kalo baca itu tulisan be su bisa reken dia pung isi kapala. Andia, baca tu penting ma jang ju lupa tulis," Bai Ndu maen puji trus.Pas omong tua bangka pung kawan brapa orang ada. Ma dong sonde huhe sadiki. Samua mulu takancing. Ama Tobo tau kanapa itu Kawasa deng Satel diam-diam sa. Itu ana muda batang dua-dua belom tangkap Tobo pung otak.Ko tau sa to. Masi papagi tu tua su baca koran. Na itu ana muda dua orang belom baca karena dar tadi malam dong marayap pi mana lobang sampe bangon pagi tarlambat. Dong dua belom baca na. Sabanarnya bukan bagitu ju. Bai Ndu pung otak taputar tu yang cari hal. Pas lia itu ana muda dong datang, tua cepa-cepa kas sambunyi koran di laci meja. Trus baptua kunci lamari. Sapa yang mo bongkar itu lamari. Mo malo'i sa son bole. Apalai mo raba deng buka. Itu tu dunia bisa kiamat. Nanti Bai Ndu boto-boto sampe gargantong putus pata ju dia tatap manyala."Bu jang bagitu. Moat Oscar tu sekolah jalas. Dia tu orang sastra deng parna anggota Dewan di Sikka sana. Mo lawan baptua dari segi apa. Ketong yang karja hari-hari tap laru tu musti tau diri sadiki," Kawasa yang ilang tadi, diam-diam pi beli koran ko babaca. Dia ju langsong pica katawa lia Bai Ndu pung maen. "Neu, mo omong apalai. Be su tau samua na," Kawasa baganggu Bai Ndu."Kalo beta satuju sa. Kalo jago kas tunjuk bisa tulis ko sonde. Ada orang yang jago baomong sa ma kalo suru tulis maen taputar nomor satu," Satel angka omong. Kamudian dia ju bilang lai kalo samua orang bisa kas pandapat bagini, nanti ketong lebe maju. Maju dalam hal bapikir deng menulis."Betol, kalo be lia, kalo satu soal banya orang bapikir lebe bagus. Itu lebe bae. Lia sa. Ko itu hari samua omong deng tanggapi baribut tantang sastra ato apa ko. Itu artenya samua pung parhatian serius," Kawasa omong sambel kas dudu dia pung tampa duduk.Sampe di sini dia bilang, baca itu tulisan Moat Oscar pung tulisan. Baptua tulis mulai SMS sampe deng bahasa tapaleuk di ketong pung koran. Itu artenya baptua mo ajak samua orang untuk bapikir deng batulis deng baek. (thomas duran)