AMA Tobo batarea mati pung pas ada lewat di itu jalan raya. Baptua takuju mo mati. Ina Mata yang ada dudu tatempel di balakang ju nae dara. Tiba-tiba sa dong dua su basa kuyup.
"Puka ra'a, cuka garam, setan alas. Lu kalo be dapa, lu ada barenti tadi, be kucak lu pung rambu, bar be injak. Ana kurang ajar. Biadab, ini ana mangkali orangtua son tau ajar sopan santun di jalan e...Jalan son bisa plan-plan ko apa, lar lewat macam dia pung nene moyang pung jalan." Ama Tobo deng Ina Mata mangomel son tau ais. Su sampe ruma ju, tua dua ni son diam. Dong dua pi bahas ulang lai ito kejadian tad siang.
"Aue, kalo satiap kali bagini, be lama-lama bisa bunu orang ato ka be mati karna be pung tensi nae." Ina Mata ada dudu kupas kacang ju ulang lai. Petu yang ada kupas sama-sama heran mo mati. Soalnya dia bar lia dia pung susi mara. Salama ini, mamtua son parna bagitu na. Dia pung mulu tu hanya ada sambayang sa. Ma ini kali laen. Mamtua su ancam mo bunu orang.
"Kanapa, Susi. Beta lia ini hari ke ada yang son beres. Dar tadi maen ancam sa, ada yang mo cari gara-gara deng Susi ko? Kalo ada na, kastau sa. Siapa tu. Beta pi be tapa san dia sampe gigi rubu, bar be injak lai." Ina Mata tamba panas. Son lama datang Ama Tobo dar dalam kamar ju baomong yang sama.
"Ini, yang bagini ni akibat. Kalo mo urus politik, mo jadi walikota, jadi gubernur, ito janji macam-macam. Be lia katong pung ama-ama dong ni. Lama-lama be son parcaya lai deng dong. Biar dong datang sampe mo tikam kapala ju, be son akan pili na." Petu tamba stres. Ais dia pung Susi deng konyadu ini hari laen na.
"Be lama-lama su pi kas mati orang. Ko karmana, be tanya dar tadi son ada yang jawab." Petu paleng dongko kalo dia pung nyadu deng susi ada kanapa-kanapa. Ais, Petu bisa jadi orang karna dong dua na.
Lia Petu ju su nae dara, Ama Tobo trus carita.
"Bagini, tadi siang, katong lewat di ito jalan di deka laut sana. Pas di itu tikungan yang ada Hotel Pante apa ko, Pante Timor ko. Aue......tiba-tiba sa, itu ana yang ada nae motor lewat son lia deng orang kiri kana. Son kas pelan ito motor ju. Pokonya dia tancap sa. Lu mo tau. Katong dua ni, panu denga aer lompor. Itu aer yang taganang di situ tu su ke lumpur. Makanya be ada dongko mo mati ni." Petu bar mangarti kanapa dia pung nyadu mara.
"Na....be kira ada mangomel apa ko, padhal yang itu. Kalo aer taganang di badan jalan tu bukan bar ini kali. Satiap taon tu amper samua jalan kana bagitu. Balom aer yang tasumbat di got, trus maluap, balom ujan. Pokoknya campor aduk. Ma bagitu, son ada satu pun orang yang mo paduli. Dong bahkan lewat di itu tampa ulang-ulang satiap hari. Ma sapa yang mo paduli. Orang samua sakarang inga diri sa. Orang lebe bae omong politik, na dong song parhatikan fasilitas di jalan. Mo galap-galap, mo ba'aer-ba'aer, mo lobang-lobang. Masa bodo sa. Paleng dong kalo lia orang mangomel pas kana bagitu, dong katawa sa. Dong bilang sala musim na.....Su tau musim ujan kanapa mo bajalan?" Petu su kas tamba dong ko dia pung nyadu. Ma, Petu ju son ilang akal. Son lama baptua, Petu su bacarita laen.
"Bagini, basong dua su dangar ko?" Petu sangaja sa, supaya dia pung nyadu deng susi son mara-mara lai.
"Ada apa, lu ni ke apa ko? Kasitau su?" Ama Tobo deng Ina Mata su satanga mati sa deng dia pu ade.
"Kalo basong dua mo, ini kota jadi bae, bason mus pili orang yang bisa paduli deng basong. Sakarang kan su mo pemilihan gubnur. Karmana-karmana na, basong dua su yang pi calonkan diri. Beta lia basong dua ni bisa jadi pasangan yang cocok untuk pimpin ini daera. Mas muda, mas ganteng, mas cantik. Apalai basong dulu parna dipili jadi Nyong deng Nona Kupang. Karmana? Satuju. Kalo satuju na, be bentuk partai baru untuk basong dua." Balom ais Petu baomong, te Ina Mata langsung sambung. In kali mamtua su son sambayang lai. Ma mamtua langsong masparak.
"Lusifer, setan. Lu kalo mo omong na yang batul kanapa? Lu mo sindir beta ko. Tagal sa lu tamat dar parguruan tinggi, bar lu mo omong beta yang eS-De ju on jalas." Ma biar mangomel, Ina Mata deng Ama Tobo son lama su pica katawa. Dong dua su mimpi sa mo jadi gubnur. (apolonia matilde dhiu)
Tidak ada komentar:
Posting Komentar