TOBO su foe mo mati. Tua su buka baju ko pake calana pendek sa. Badan ju dia kas talanjang. Biar Ina Feok ada batareak kestau baitua pake baju kaos ma Tobo malas tau. Tobo su jungkir balek, lompat sana sini deng batareak sabarang di jalan deng anak kici dong.
"Neu, lu pi maen deng ana kici dong. Ma sabantar kalo lu pung asma kambu na jang batareak sang beta eee.. Dasar laki-laki bagatal," Ina Feok su mara harbabiru dia pung laki. Tobo son dengar maitua pung omong sampe bamaki bagitu.
Maitua ju tamba spaning lai lia Tobo su pi baganggu harim tenak dong yang ada lewat pake calana pendek sa. Amper-amper dia mo pegang itu harim dong apa ko. Ko dia su makan gigi na. Lia bagitu dia rasa ke masi muda dolo. Dia rasa ke itu hari dia bakatumu dia pung maitua Ina Feok. Ma kapan eee. Su la...ma mati pung. Su lupa dia pung tanggal deng hari. Yang dia masi ingat tu pas dia bakanal Ina Feok sore-sore.
Mamtua yang jadi bunga di itu desa tu bekin Tobo barlutut na.
Ma sakarang lia ke apa ko. Ko su tua na. Su son pake lipstik, rambut dong ju maitua kas biar sa sampe baju dong ju itu-itu. Dolo satu jam mangkali pake baju laen-laen.
Son lama Tobo su masok ruma deng manggigil. Dari pintu depan tua su batareak kras minta maitua kas handuk. Ina Feok su masa bodo. Ko ada mara na. Tadi dia mara taku jang sampe Tobo pung asma kambu. Trus yang bekin tampa spaning lai tu Tobo pung mata ili ala tadi pi harim dong.
Son lama Ama Kolo su datang ko bakastau. Dia bilang sakarang tu ada bancana di ketong pung kampong. Ada satu kelu yang kana timbun tanah sampe gem, lima ko empat warga satu desa tarjebak deng dong pung trek di kali mana ko. Dengar bagitu Tobo deng maitua langsong siap mo pi cek jang sampe ada dong pung kelu yang dapa masala.
"Ini ujan ni yang bekin be ke apako. Dari kamarin son barenti-barenti. Sampe samua mata air belom tabuka na." Ama Kolo bilang kalo di baca di koran tu di daera lain son ada ujan deng angin. Mala di sana tu api ada bamakan dong pung lahan.
Yang bekin Tobo kaget tu Ina Feok su pake kutang sa ko pi mandi di aer ujan sana. Itu karena aer di kamar mandi su son ada lai. Tobo su batok sampe son sabar panggel balek maitua ma son bisa. Maitua jawab bilang, ko lu dar tadi ju bagini to. Ko beta son bisa.
Ina Feok pung jawab itu yang bekin Tobo spaning. "Lu mandi son soal ma lu hanya pake kutang sa to. Karmana nanti orang bilang sang beta. Ato nanti lu bekin orang telan aer liur sa di situ ko," Tobo su mara maitua.
"Ko ini su tua kakaluk mo bekin apa lai. Tete dong ju su kempes samua to," Ina Feok omong son pele-pele lai. Dong dua laki bini kamudian mandi sama-sama sambel bakajar. Dong pung ana Satel yang lia hanya sanyum-sanyum sa. (reddy ngera)
Tidak ada komentar:
Posting Komentar