MAMTO'O Ne'i masi pag-pagi su dudu di teras sambil baca koran. Mamtua takaget-kaget karna ada barita wartawan Pos Kupang kana papoko deng kana karoyok sampe dia pung bibir pica. "Adu kasian e. Kanapa ko dong musti maen karoyok bagitu e," mamtua Ne'i samangat baca koran.
Dia pung mata lia tarus di koran, sonde toe deng dia pung laki yang ada minta kopi panas. To'o Pe'u su tarus minta kopi ma tapi mamtua Ne'i sonde nodek ju. Baptua su mulai nae dara. "We, lu pung talinga su tuli ko. Beta su minta tigakali ko lu bekin kopi ju lu sonde toe. Tarlama beta angka buang itu koran," To'o Peu pung suara su nae tinggi.
Kalo baptua su mulai nae dara, baru mamtua angka kas turun koran. "Sabar dolo, ini barita panas ni. Makanya bangun pag-pagi, jang ko su lia beta baca koran, baru minta ini itu. Tau ko sonde, ini wartawan Pos Kupang di Manggarai Barat ada kana papoko deng karoyok dari preman dong. Kasian dia pung bibir pica. Sabantar do, beta baca kasi abis baru beta pi bikin kopi," mamtua Ne'i balas baomong.
Tarlama ju dia capat-capat pi dapur ko bekin kopi abis itu bawa kasi baptua Pe'u. "Sapa e, yang bekin bagini, pung harbabiruk lai. Kalo mo kasi tarang barita bukan bagitu dia pung cara. Pange bae-bae ko kasi jalas. Beta baca di koran, itu masala yang dong tanya tu, sonde ada hubungan deng wartawan Pos Kupang, ko itu wartawan son parna tulis tentang bank en te te. Beta kira pasti karna masala laen o,' baptua lipa koran ko minum kopi.
"Ho beta rasa itu karna kasus laen ko, di koran sakarang ni, ada panas-panas tentang ubi aldira, jang sampe bank ntt tu hanya alasan sa, buat dong cari masala, su bagitu pake ancam lai mo lapor pi mana na lapor sa, te itu dong pung tana air. Dong kira- kira di ini nagara sonde ada hukum lai, ko dong paling kuasa su. Nanti kalo su kana hiki di leher baru muka kici besar," mamtua Nei tamba dia pung pandapat.
Dong dua orang tar liat kalo dari tadi Ama Tadu su badiri di situ karna dong dua asik badiskusi. "Beta rasa pasti ada orang di balakang, orang bilang aktor intelektual. Polisi musti usut sampe tuntas. Jang sampe ko dong mulai bikin alasan macam-macam deng taputar macam-macam. Labuan Bajo tu kan kici ana, jadi itu orang dong musti ditangkap. Polisi musti cari tau sapa dia pung otak di balakang ini kejadian. Kotong su bisa baca, kanapa wartawan tu kana papoko, pasti dong su mulai takut, andia ko harbabiruk puku orang. Pokonya yang panting polisi harus usut sampe tuntas supaya kotong tau kebenaran. Ju supaya itu orang tau kalo ada hukum yang ditegakan," Ama Tadu omong samangat punya. (hermin pello)
Tidak ada komentar:
Posting Komentar